படுக்கையறையில் காமிரா வைக்காமல் கள்ளச் சாமியாரை கண்டுபிடிப்பது எப்படி?

கள்ளச் சாமியார்கள் மக்களை ஏய்த்து வருவது எப்போ ஆரம்பித்தது என்று திட்டவட்டமாகச் சொல்ல முடியாத அளவுக்கு ரொம்ப காலமாக நடந்து வருகிறது, தற்போதும் நடக்கிறது, இனி வரும் காலங்களிலும் நடக்கும்.  இவர்களிடம் ஏமாறுபவர்கள் வெறும் அப்பாவிகளா என்று பார்த்தால் அதுவும் இல்லை.  அதிபுத்திசாலித்தனம் கொண்ட,  நாட்டின் உயர்கல்வி நிறுவனங்களில் பயின்றவர்களும், பெரிய பணக்காரர்களும் இவர்களிடம் எளிதில் ஏமாந்து கற்பையும், கோடிக்கணக்கான ரூபாய் மதிப்பிலான சொத்துக்களையும், வாழ்க்கையையும் தொலைக்கிறார்கள். இவ்வளவு படித்த நீங்கள் எப்படி எமாந்தீர்கள் என்று கேட்டால், "எங்களை விடுங்கள், அமரிக்காவில் மக்கள் மனங்களை படிக்கத் தெரிந்த மனோதத்துவ நிபுணரே [சைக்காலஜிஸ்ட்] இந்த சாமியார் பேச்சைக் கேட்டு தான் சேர்த்து வைத்திருந்த ஒன்று முதல் இரண்டு கோடி ரூபாய் வரையிலான சொத்துக்களை இவருக்கு தானமாக வழங்கியிருக்கிறார், நாங்கள் எம்மாத்திரம்?" என்று அவரது சாமர்த்தியத்தை பறை சாற்றுகிறார்கள். வெறும் பேச்சை வைத்தே ஆயிரம் கோடிகளில் சொத்து சேர்க்கத் தெரிந்த இந்த மாதிரியான சாமியார்களிடம் இன்போசிஸ், விப்ரோ போன்ற நிறுவனத்தை உருவாக்கி நடத்தும் சாமர்த்தியம் இருக்கிறது,  ஆனால் அவர்கள் பிராடு வேலை செய்யப் போய்விட்டது தான் துரதிர்ஷ்டவசமாகும். 

சமீபத்தில் பிரபலமான கள்ளச் சாமியார் தன்னை நடிகையோடு இருப்பதாக காட்டிய காட்சி உண்மையல்ல, கணினியால் சித்தரிக்கப் பட்டது என்று சாதிக்கிறார்.  அந்த காட்சி படமாக்கப் பட்ட நேரமும், தேதியும் ஒவ்வொரு காட்சியிலும் தோன்றுகிறது.  அதே சமயம் இவர் கலந்துகொள்ளும் ஒவ்வொரு பொது நிகழ்ச்சியும் ஊரறிய படமாக்கப் படுகிறது, அந்த நடிகையும் அவ்வப்போது விமானத்தில் பறப்பவர்.  வீடியோவில் காட்டப் படும் தேதி, நேரங்களில் ஏதாவது ஒன்றை எடுத்து அந்த நேரத்தில் நாங்கள் வேறு இடத்தில் இருந்தோம், அந்த காட்சியில் இருந்திருக்க வாய்ப்பே இல்லை என்று காட்ட இவர்கள் இதுவரை ஏன் முயற்சிக்கவில்லை என்பது விந்தையாக இருக்கிறது.  ஏதோ நம்ம அதிர்ஷ்டம் ஒரு புண்ணியவதி  இவர் படுக்கையறையில் கேமராவை வைத்து நம்மைக் காப்பாற்றி விட்டார், கேமாரவில் பெண்ணுடன் சிக்கியதால், இவர் ஒருத்தர் மட்டும் போலி ஆன்மீக வாதி மற்றவர்கள் யோக்யர்கள் என்று அர்த்தமல்ல. "மாட்டாத வரை எல்லோரும் யோக்கியர்களே" என்ற தத்துவத்தின் அடிப்படையில் வெளியில் கொல்லை பேரு இன்னமும் சிக்காமல் உலாத்திக் கொண்டிருக்கிறார்கள். அதில் பலர் கடைசி வரை எல்லா அயோக்கியத்தனமும் செய்து வாழ்ந்து, மாண்ட பின்னர் தலைமுறை தலைமுறைக்கும் கடவுளாக்கப் படுகின்றனர் என்பது தான் ஜீரணிக்க முடியாத உண்மை. இந்த மாதிரி படுக்கையறையில் வைக்கப் படும் கேமராக்களை நம்பாமல் போலி ஆன்மீகவாதிகளை அடையாளங்கண்டு நம்மை காத்துக் கொள்ள வழி இருக்கிறதா என்று பார்ப்பதே இந்தப் பதிவின் நோக்கம்.

பொதுவாக கள்ளச் சாமியார் என்றால் பெண்களுடன் பாலியல் ரீதியாகத் தொடர்பு வைத்திருப்பவர், அவ்வாறு அல்லாதவர் நல்ல சாமியார்  என்று நம்மில் பலரும் தவறாக நினைக்கிறோம்.  உண்மை அதுவல்ல.  பாலியல் ரீதியான ஒழுக்கம் என்பது ஆன்மீக வாதிக்கு உண்டான தகுதிகளில் ஒன்றுதானே தவிர அதுவே முழுத் தகுதியும் ஆகிவிடாது.   சொல்லப் போனால் திருமணம் செய்து குழந்தைகளோடு இருப்பவர்களும் நல்ல ஆன்மீக வாதிகளாக இருக்க முடியும்.  உண்மையில் தகுதியான சாமியாரால்  கள்ளத் தனம் செய்யவே முடியாது, எனவே கள்ளச் சாமியார் என்ற சொற்றொடரே முரணாகும். "கருணையான கொலைகாரன்", "நேர்மையான திருடன்" என்பது போல !!  நாம் இவர்களை போலி ஆன்மீகவாதிகள் எனலாம், இதன் பொருள் இறைவனை அடைய நமக்கு வழிகாட்ட தகுதியற்றவர்கள் என்பதாகும்.

முதலில் எல்லோருக்கும் தெரிந்த திருவண்ணாமலை ராஜசேகரனை எடுத்துக் கொள்வோம். பாலியல் ரீதியாக அல்லாமல், மற்ற விஷயங்களை வைத்து இவர் ஒரு நல்ல ஆன்மீகவாதிதானா என பார்ப்போம். பின்னர் இதையே மற்றவர்களுக்கு எவ்வாறு விரிவுபடுத்துவது என்றும் பார்ப்போம்.

1. இவருடைய குரு யார்?:  உலகெங்கிலும் லட்சக் கணக்கான சீடர்களுக்கு தான் குரு என்கிறார்.  முதலில் சீடனாகவேண்டும், குருவின் போதனையைப் பின்பற்றி பூரணத்துவம் பெற வேண்டும் அதற்க்கப்புறம் தான் குருவாக முடியும்.  இவர் முதலில் ஊரைச் சுற்றி எக்கச் சக்கமான சீடர்களை உண்டு பண்ணிவிட்டு அவர்களில் பலரை சந்நியாசம் என்ற நிலை வரை உயர்த்தியதாகச் சொல்லிவிட்டு, அதற்க்கப்புறம் தான் இவரே சீடராகியிருக்கிறார்?  இந்த கூத்து எங்கே நடக்கும்?  சமீபத்தில் தான் மதுரை ஆதீனத்தை தன்னுடைய குரு என்று சொல்லிக் கொண்டார்.   அப்படியானால் இத்தனை நாட்கள் இவருக்கு குருவாக இருந்தது யார், அவர் தற்போது இவருடைய குருவா இல்லையா?  அந்த மாதிரி குருவை மாற்றுவது ஏற்கத் தக்கதா?   தற்போது மதுரை ஆதீனத்தால் கலட்டி விடப் பட்டு பாதியாகிப் போன பின்னர் இவருடைய குரு யார்?  குருவே தேவை இல்லை என்று அர்த்தமா?  

இவர் 120 நாடுகளில் தனது இயக்கத்தை விரிவு படுத்தி லட்சக்கணக்கான தொண்டர் படையைச் சேர்த்ததோ,  நூற்றுக் கணக்கான கோடி சொத்து செர்த்ததோ, பள்ளியில் படிக்கும் போது தனது பையில் படத்தை வைத்து அழகு பார்த்த நடிகையையே பின்னொரு நாளில் தனக்கு  "பணிவிடை" செய்ய வைத்ததோ [காணொளி சுட்டி1] [காணொளி சுட்டி2], வெறுமனே டிப்ளமோ படித்த இவர் BITS பிலானியில் பயின்றவரை சிஷ்யை ஆக்கியதோ எதுவும் ஆச்சரியமாகத் தோன்றவில்லை.  தான் அள்ளி முடியுமளவுக்கு தலை நிறைய முடியை வளர்த்து வைத்துக் கொண்டு டஜன் கணக்கான வெளிநாட்டவர்களுக்கு மொட்டையடித்து அவர்கள் கையில் ஒரு தண்டத்தைக் கொடுத்து (மூங்கில் கம்பு)  நிற்க வைத்தாரே, [சுட்டி] அது தான் வியப்பாக இருக்கிறது!!  ஒருத்தர்  கூட, "ஏன் ஸ்வாமி, நீங்க மட்டும் பொம்பளைங்களை விட நீளமா முடியை வச்சிக்கிட்டு, எங்களையெல்லாம்  மொட்டை அடிக்கச் சொல்வது ஏன்?"  என்ற கேள்வியே கேட்டிருக்க மாட்டாரா?!   

2. பெண்கள் சந்நியாசம் ஏற்பது தகுமா?:  இவர் சந்நியாசம் வழங்குவதை ஆண்களோடு மட்டும் நிறுத்திக் கொள்ளவில்லை, பெண்களையும் சேர்த்துக் கொள்கிறார். [சுட்டி] அவர்களுக்கு மொட்டையடிப்பதில்லை என்பது மட்டுமே வேறுபாடு.  திருமணத்திற்கு முன்னர் பிரமச்சாரியம், திருமணமானதும் கிரகஸ்தன், ஐம்பது வயதில் மனைவியுடன் புனிதத் தளங்களுக்கு செல்லும் வானபிரஸ்தான், இறுதியாக எல்லாவற்றையும் துறந்த நிலையை அடைந்த சந்நியாசி போன்ற நான்கு நிலைகளில், முதல் மூன்றில் பெண்கள் இருப்பினும் நான்காவதான சந்நியாசம் என்பது ஆண்களுக்கு மட்டும்தான்.  இது தான் வேத கலாச்சாரம்.  பெண்கள் துறவு நிலைக்கு ஏற்றவர்கள் அல்ல, வாழ்வில் எந்த ஒரு காலகட்டத்திலும் அவர்கள் தங்கள் பெற்றோர்கள், கணவர், சகோதரர்கள் அல்லது தங்களது வயது வந்த மகன்களுடனோ மாத்திரமே இருக்க வேண்டும்.  தனியான வாழ்வு அவர்களுக்கு வேத கலாசாரம் தரவில்லை.  சந்நியாசம் அவர்களுக்கு இல்லை.   முக்கியமாக கலி யுகத்தில் ஆண்களாயினும் சந்நியாசம் என்பதே தவிர்க்கப் படவேண்டும் என்று அறிவுறுத்தப் பட்டுள்ளது.  பருவடைந்த இளம்பெண் ஒரு போதும் திருமணம் முடிக்காமல் இருக்கலாது என்ற வேதங்களின் அறிவுரையைப் புறக்கணித்துவிட்டு  இவர் இளம்பெண்கள் கையில் கமண்டலம், தண்டத்தைக் கொடுத்து சந்நியாசினி என்று பெயரும் கொடுத்து அனுப்புகிறார்,  இந்த அட்டூழியம் எங்கே நடக்கும்? எந்த வகையில் இவர் வேத கலாசாரத்தைப் பின்பற்றுவதாகச் சொல்கிறார் என்று புரியவில்லை.

3. இவர் பற்று  இல்லாதவரா? உங்களுக்கு சொந்த பந்தங்கள் மேல் பற்று இல்லையா என்ற கேள்விக்கு இவர் சொல்கிறார், "எனக்குள் வாழ்க்கையைப் பற்றி ஏற்ப்பட்ட கருத்துக்களின் முதிர்ச்சியினால் ஆசாபாசங்கள் முழுக்க முழுக்க என்னிடமிருந்து உதிர்ந்து விட்டன.  அவ்வாறு ஆசாபாசங்கள் தானாகவே உதிர்ந்தத பின்னர் தான் நான் சந்நியாச வாழ்க்கையையே ஏற்றேன்".  [சுட்டி] இவர் தேனொழுகப் பேசுவது எல்லாம் மயிர் கூச்செறியச் செய்யும் வண்ணம் தான் இருக்கும் ஆனால் அத்தனையும் பேத்தல் என்பது கொஞ்சம் உற்று நோக்கினால் விளங்கும். உதாரணத்துக்கு   இவரது மடத்தில் அதிகப் படியான வருமானம் வரும் துறை,  சிலைகளை வெளிநாடுகளுக்கு ஏற்றுமதி செய்வதாகும்.  இதை இவரது உடன்பிறந்த தம்பி கோபி என்பவருக்கும், அண்ணன்  செந்தில்குமார் என்பவருக்கும் தான் ஒப்படைத்திருக்கிறார்.  மேலும் பணம் கொழிக்கும் முக்கிய வேலைகள் அத்தனையும் இவர்கள் கைவசமே இருக்கக் கூடும். ஆக இவர் தலையில்  இருந்த முடியைக் கூட இழக்க மனமில்லை, அப்புறம் சொந்த பந்தம் எங்கே உதிர்வதற்கு!!

4.  சந்நியாசி வண்ண உடைகள் உடுத்தலாமா?  சந்நியாசம் ஏற்ற பின்னர் காவி உடை மட்டுமே உடுத்த வேண்டும்.  சங்கர மடத்திலோ, வைணவ சம்பிரதாயங்களிலோ  சந்நியாசிகள் எங்கும் வண்ண உடைகள் உடுத்த இயலாது.  அனால் இவரது படத்தை கூகிளில் ஒரு தமாசுக்கு தேடினால் இவர் அணியாத வண்ணமே இல்லை என்னும் அளவுக்கு எல்லா வண்ணத்திலும் உடை உடுத்துகிறார்.  இது எதில் சேர்த்தி என்றே தெரியவில்லை. 

5.  சாதுவுக்கு களங்கம் ஏற்படுமா?  இவர் பாலியல் குற்றச்சாட்டால் சிறைக்குச் சென்று விசாரணை முடிந்து வெளிய வந்த சமயம்.  தான் சிறைக்குச் சென்றதால் களங்கப் பட்டதாகவும் அதைப் போக்க தன்னைச் சுற்றி தீ வைத்து ஏதேதோ சடங்குகளைச் செய்து அவற்றை நிவர்த்தி செய்யப் போவதாகவும் சொல்லிக் கொண்டார்.  ஒருத்தர் உண்மையில் ஆன்மீகத்தில் பூரணத்துவம் அடைந்தவர் என்றால் அவரை யாராலும் களங்கப் படுத்த முடியாது.  சொல்லப் போனால் அவர் செல்லுமிடங்கள் எல்லாம், அவரது  பாதம் பட்டவுடன் தங்களது களங்கத்தை போக்கிக் கொள்ளும்.  மற்றவர்கள் புனித நதிகளில் நீராடும்போது அவர்கள் பாவங்களை நதிகள் ஏற்கும், அதே நதியில் ஒரு தூய ஆன்மீகவாதி இறங்கும் போது மற்றவர்களால் சேர்ந்த பாவங்கள் நீங்கி அந்த நதிகளுக்கே விமோசனம் கிடைக்கும்.  ஆக நான் ஜெயிலுக்குள் போனதால் களங்கமடைந்தேன் என்பதே பித்தலாட்டம், அதுக்கு முன்னாடியே களங்களாகத்தான் இருந்தார் என்பதுதான் நிஜம்.   போகாத களங்கத்தை  போக்க சாமான்ய மக்களுக்கு விநியோகிக்கப் படும் ரேஷன் கடை மண்ணெண்ணையை  வீணடித்தது மகா அயோக்கியத் தனம்.  [சுட்டி].

 6.  மேலே உள்ள தகவல் விக்கி பீடியாவில் இருந்து எடுத்தது.  இதையே இவரது தளங்களிலும் புத்தகங்களிலும் பார்க்கலாம்.  இவர் பிறந்த தேதி -ஜனவரி 1, 1978 என்று கொடுக்கப் பட்டுள்ளது,  ஆனால் இவரது பாஸ்போர்ட்டில் மார்ச் 13, 1977 என கொடுக்கப் பட்டுள்ளது.  எது உண்மை?  மேலும், இவர் ஞானமடைந்த தேதி ஜனவரி 1, 2000 என்கிறார்.  தமிழ்நாட்டில் பிறந்த இவருக்கு ஏன் எல்லாமே ஆங்கில நாட்காட்டியைப் பொறுத்தே நகர்கிறது என்பது மட்டும் விளங்கவில்லை   மேலே கடைசியில் உள்ள தகவல் இவரே பலமுறை தொலைக்காட்சிகளில் சொல்லியிருக்கிறார், "நான் கடவுள் என்று சொல்லவில்லை, நீங்கள் எல்லோரும் கடவுள் என்று சொல்ல வந்திருக்கிறேன்".  இது தான் இருப்பதிலேயே மிகப் பெரிய பித்தலாட்டம். அதெப்படி எல்லோரும் கடவுள் ஆக முடியும்?  மனுஷன் மனுஷன் தான், கடவுள் கடவுள் தான்.  மனுஷன் இப்போதும் வீடு பேரு அடைந்த பின்னரும் கூட இறைவனுக்கு சேவை செய்யும் நிலைதான், அதில் தான் அவனுடைய உண்மை நிலை, மாறாத நிலை.  [சுட்டி ]

7.  பத்திரிகையாளர்களின் சந்திப்பின் போது இவர் காறித் தூ.....  என்று எல்லோர் முன்னிலும் துப்பியிருக்கிறார், [சுட்டி 8:00 வது நிமிடத்தில்] இதை ஒரு சாது செய்வாரா என்பதை முடிவு செய்ய உங்களுக்கே விட்டு விடுகிறேன்.  இவர் வாயிலிருந்து சில சாபங்கள் வெளி வந்திருக்கின்றன:

"அழிக்கப் பட்ட சிவாலயங்கள் உங்கள் வம்சத்தை நாசமாக்கும்".  [சுட்டி] 

"120 நாடுகளில் உங்கள் சிலைகளை வைத்து செருப்பால் அடிப்பார்கள்"   [சுட்டி 8:00 வது நிமிடத்தில்]

இந்த வார்த்தையெல்லாம்  தான் சாது, ஜீவன் முக்தி [அப்படின்னா என்ன கருமமோ தெரியல] அடைந்தவர் என்று சொல்லிக் கொள்பவர் வாயிலிருந்து வரலாமா?  புராணங்களில் முனிவர்கள் சாபம் கொடுப்பார்கள் ஆனால் உண்மையில் அது வரம்.  அகலிகை "கல்லாய் போகக் கடவது" என்று சாபம் பெற்றது போலத் தோன்றும். ஆனால் இராமனின் பாதம் அவள் மீது பின்னால் படப் போவதற்கான வரம் அது.   தனக்கு கெடுதியே வந்தாலும் ஒரு சாது பதிலுக்கு கெடுதி செய்ய மாட்டார், நன்மையையே செய்வார்.  ஆனால், வம்சம் நாசமாகப் போகட்டும் செருப்பால் அடிப்போம் என்பதெல்லாம் அத்தகைய வகையைச் சார்ந்ததல்ல.  மூன்றாம் தர மனிதர்கள் பயன்படுத்தும் வார்த்தைகள், சாதுக்கள் வாயில் இருந்து வராது.

8.  இவர் ஒரு கதை சொல்கிறார். [சுட்டி] ஒரு ஜென் மாஸ்டர் புகைப் பிடிக்காதே, குடிக்காதே  என்று எல்லோருக்கும் சொல்லிவிட்டு அவர் எப்போ பார்த்தாலும் புகை பிடிப்பாராம்.  இதைப் பார்த்த ஒருத்தர் என்ன மாஸ்டர் எங்களை "புகைப் பிடிக்காதே, குடிக்காதே" என்று சொல்லிவிட்டு நீங்க மட்டும் பார்க்கும் போதெல்லாம் புகைக்கிறீர்களே என்று கேட்டாராம். அதற்க்கு அவர், என்னோட லெவலே வேற, அதனால உன் லெவலுக்கு பொருந்தும் அறிவுரை எனக்குப் பொருந்த வேண்டியதில்லை, "Don't do what Masters do, do what they say" என்றாராம்!! .  இவர் வீடியோவில் நடிகையோடு மாட்டியபோது இதைச் சொல்லித் தப்பித்திருக்கலாம், ஏனோ விட்டுவிட்டார்!!  அது போகட்டும், உண்மையில் ஒரு சாதுவுக்கு இப்படிப் பட்ட நியமங்கள் எதையும் பின்பற்றத் தேவையில்லையா?  நிச்சயம் தேவை.  அவர்கள் தன்னை உணர்ந்த ஆன்மாக்கள் அவர்களுக்கு எந்தக் கட்டுப் பாடும் தேவையில்லை என்றாலும், அவர்கள் எதைப் போதிக்கிறார்களோ அதை பின்பற்றவும் செய்வார்கள் காரணம் அவர்களைப் பார்த்து மற்றவர்களும் பின்பற்ற வேண்டுமென்பதற்காக!!  

9.  இவரு அப்பப்போ சிவன் [சுட்டி], கிருஷ்ணன் வேஷம் போடுறாரு [சுட்டி].   அதற்க்கு என்ன அர்த்தம்னு இன்னமும் விளங்கவில்லை.  இவரும் அவர்களைப் போல படைத்தல், காத்தல் அழித்தல் செய்யத் தகுதியாவரா?  [வருஷத்துக்கு ஒரு தடவை சீக்ரெட்டா அம்மன் வேஷமும் போடுவாராம், அதைப் பார்க்க காசு கொஞ்சம் ஜாஸ்தியாம், அதற்காகத்தான் தலையை மொட்டையடிக்காம வச்சிக்கிட்டு திரியறாராம்!!].  எந்த தூய பக்தரும் நான் சிவன், நான் கிருஷ்ணன் என்று சொன்னதாகச் சரித்திரமே இல்லை.  எல்லோரும் நான் அவர்களின் திருவடி சேவகன் என்றே சொல்லியிருக்கிறார்கள் அதுவே உண்மையும் கூட. 

இது போல இன்னமும் சொல்லிக் கொண்டே போகலாம்.  இவரைப் பற்றி வெளியிடப்பட்ட  நடிகையுடனான படம் பொய் என்றே நிரூபிக்கப் பட்டாலும், இவர் ஒரு நல்ல ஆன்மீகவாதி இல்லை என்பது மட்டும் மறுக்க முடியாத உண்மை.  

பொதுவாக போலி ஆன்மீக வாதிகளை எப்படி கண்டுபிடிப்பது?

• நான் கடவுளேதான் என்று சொல்வான், அல்லது அவனது சீடர்கள் அவனை கடவுள் என்று சொல்லிக் கொண்டிருப்பார்கள்.

• ஆன்மீக குருவே தேவை இல்லை, என்று இவர்கள் குருவாக இருந்து உங்களிடமிருந்து பணத்தை பிடுங்கிக் கொண்டிருப்பார்கள்.  அவர்களுக்கென்று ஆன்மீக குரு யாரும் இருக்க மாட்டார்கள், அப்படியே இருந்தாலும் அவர்களுக்கு முன்னர் ஒன்றிரண்டு தலைமுறைக்கு மேல் யாராவது ஒருத்தர் குரு இல்லாமல் தான்தோன்றியாக இருப்பான்.

• வாயில் இருந்து லிங்கம் எடுப்பது, கையில் இருந்து திருநீறு வாட்ச், தங்க மோதிரம் தங்கச் சங்கிலி எடுத்தல் போன்ற வேலைகளைச் செய்வான்.  தங்கம் வி.ஐ.பி க்களுக்கு மட்டும் தான் கிடைக்கும், ஏழைகள் லிங்கம் எடுக்கும் மேஜிக் வித்தையை எல்லோருடனும் உட்கார்ந்து பார்க்கலாம். அவன் கொடுக்கும் வாட்ச் எங்கே எப்போது வாங்கியது என்பதையும் கண்டுபிடிக்கலாம். 

•   மடத்துக்கு போகும் பக்தர்களுக்கு குரு வைத்தியம் பார்ப்பார், நோய்கள் பலவற்றை குணப் படுத்துவார்.  [வைத்தியம் பார்ப்பது தப்பில்லை, ஆனால் அது ஆன்மீக வாதியின் வேலையும் இல்லை.  வைத்தியம் மருத்துவர்தான் பார்க்கணும், அதற்க்கு மருத்துவ மனைக்குத்தான் செல்ல வேண்டும்.  ஆன்மீகவாதி, ஆன்மாவை உணரவும், இறைவனை உணரவும் வழி சொல்ல வேண்டும். ]

• முக்தி அடைந்தால் நீங்க கடவுளோடு ஒன்னாயிடுவீங்க, அதற்க்கப்புறம் கடவுள் நீங்க என்ற பேதம் மறைந்து போயிடும் என்று போதிப்பவர்கள். 

• கடவுளுக்கு உருவமே இல்லை என்பவர்கள்.   கண் இல்லாதவன் குருடன், காது இல்லாதவன் செவிடன், கால் இல்லாதவன் நொண்டி, தலை இல்லாதவன் முண்டம், இப்படி எது எதெல்லாம் இல்லைன்னு திட்டுகிறோமோ  அத்தனையும் ஒண்ணாச் சேர்த்து ஒரே வார்த்தையில் திட்டனுமா?   உருவம் இல்லாதவனேன்னு சொன்னாப் போதும், அதைத்தான் இவர்கள் செய்கிறார்கள்,

 எது போலி என்று சொல்லிவிட்டோம், இனி எது நல்லது என்பதையும் சொல்ல வேண்டும்.  நல்ல ஆன்மீக வாதியை கண்டுபிடிப்பது எப்படி?  அடுத்த பதிவில் பார்ப்போம்.